Dan takarar shugaban kasa na Jam’iyyar PDP, Atiku Abubakar, ya ce zai kalubalanci sakamakon zaben shugaban kasa na 2023 da aka gudanar a ranar Asabar a kotu.
Atiku, a wani taron manema labarai a ranar Alhamis a Abuja, ya ce matakin bai shafe shi ba kai-tsaye, amma zai yi haka ne don dimokuradiyyar Najeriya.
- NAJERIYA A YAU: Dalilin kin fitar ’yan Najeriya zaben shugaban kasa
- Fyade: Kotu ta daure mutumin da ya yi luwadi da ’yar cikinsa
“Zaben da aka gudanar a karshen mako babu gaskiya a cikinsa. Binciken farko ya nuna cewa shi ne zabe mafi muni da aka taba gudanarwa tun bayan dawowar mulkin dimokuradiyya a 1999.
“Magudi da zamba da aka yi a wannan zaben, ba a taba yin irinsa ba a tarihin kasarmu.
“Na kasa fahimtar dalilin da ya sa aka yi gaggawar bayyana sakamakon zaben duk da korafe-korafen da aka yi game da shi,” in ji shi.
Ya ce tuni ya tuntubi shugabannin jam’iyyarsa ta PDP da ’yan Najeriya daga bangarori daban-daban kan sakamakon zaben, kuma suka cimma matsayar garzaya wa kotu.
Atiku ya ce masu sanya ido na cikin gida da na waje sun tabbatar da akwai kura-kurai a zaben.
Ya ce ya yi imanin cewa wannan ba shi ne alkawarin da Shugaban Kasa Muhammadu Buhari ya yi ba, kuma bai makara ba ya gyara barnar da aka yi a zaben.
Atiku Abubakar ya zo na biyu a zaben da aka gudanar bayan shan kaye a hannun Tinubu na jam’iyyar APC.
