An tsinci gawar wani manomi bayan mako biyu da sace shi duk da biyan Naira miliyan daya da dubu 600 da iyalansa suka yi a matsayin kudin fansa.
Mutumin mai suna Oluwole Agboola dai an sace shi ne tun ranar 28 ga watan Disambar 2020, kafin ranar Talata kuma a tsinci gawarsa.
- An tsinci gawar ma’aikacin gwamnati wata daya bayan sace shi
- Hamar: Kabilar da mata ke shan duka kafin a aure su
Wasu ’yan bindiga sanye da kakin sojoji ne suka yi awon gaba da shi yana tsaka da aiki a gonarsa da ke kauyen Olukitibi na Karamar Hukumar Akinyele ta Jihar Oyo.
Rahotanni sun ce maharan sun kashe shi ne duk kuwa da karbar makudan kudaden daga hannun iyalansa a matsayin kudin fansa.
Wani dan uwan mamacin, Olakunle Agboola ya tabbatar wa da ’yan jarida cewa an tsinci gawar manomin ne a Ibadan, babban birnin Jihar.
Ya ce an kashe dan uwan nasa ne kwanaki 10 bayan karbar kudin fansarsa daga hannunsu.
