A halin yanzu ‘yan sanda sun tarwatsa masu zanga-zangar #EndSARS a unguwar Area 10 da ke Garki a Abuja.
Wakilin Aminiya ya ruwaito cewa, an tarwatsa masu zanga-zangar ne ta hanyar yi musu tarnaki da hayaki mai sanya hawaye.
An hango masu zanga-zangar na gudun yada kanin wani a kan titi a lokacin da ‘yan sanda ke harba hayaki mai sanya hawaye a yankin kasuwar UTC da ke Garki.
Yayin da aka nemi jin ta bakin wasu daga cikin masu guje-guje don gano dalilin gudun da suke, wasunsu sun ce sun zo kasuwa siyayya ne aka tarwatsa su, yayin da neman jin ta bakin masu zanga-zangar ya ci tura.
Bayan da wakilin Aminiya ya kewaya zuwa mashigar kasuwar ta UTC, inda ya tarar da shingayen ‘yan sanda a hanyar shiga kasuwar, a gefe guda kuma ga masu zanga-zangar na guna-guni.
A yanzu haka dai an jibge ‘yan sanda a wuraren masu zanga-zangar suka yi sansani.
Da alama dai masu zanga-zangar #EndSARS sun ci gaba da yi duk da umarnin da kungiyar da ta jagoranci zanga-zangar tun daga farko ta yi, na kowa ya koma gida ya zauna.
