Aƙalla mutane biyu da suka haɗa da ’yan banga ne aka kwantar a asibiti sakamakon wani rikici da ya ɓarke tsakanin mazauna unguwar Soje da ke Minna, babban birnin Jihar Neja da kuma ’yan banga a yankin.
Aminiya ta samu rahon cewa rikicin dai ya faru ne da daddare a ranar Talata wanda ya samo asali sakamakon farmakin da aka kai wasu wuraren da ake zargin ‘yan fashi ne da masu safarar miyagun ƙwayoyi a wurin.
- Tinubu ya shafe kwanaki 180 daga cikin 580 da ya yi na mulkinsa a ƙasar waje – Obi
- Sanatan Kaduna ya tsallake rijiya da baya
Mazauna garin sun shaida wa Aminiya cewa ɗaya daga cikin ’yan banga ya samu raunuka a lokacin da suka yi arangama.
Ɗaya daga cikin mazauna yankin da ya nemi a sakaya sunansa ya ce yankin da aka kai farmakin bai zama wani yanki na wuraren da masu aikata laifuka ke amfani da su ba.
Kakakin Rundunar ’Yan sandan Jihar Neja, SP Wasiu Abiodun, ya tabbatarwa da wakilinmu faruwar lamarin.
Ya ce, tuni aka umarci ’yan banga da su riƙa aiki tare da ‘yan sanda a kodayaushe tare da kai farmaki kan duk wani wurin da ake zargi wurin zaman masu aikata laifuka ne.
“An kai waɗanda aka raunata asibiti domin yi musu magani yayin da al’ummar yankin suka yi alƙawarin wanzar da zaman lafiya tare da dawo da zaman lafiya.
“Sai dai ana ci gaba da ƙoƙarin cafke waɗanda ake zargin da suka tsere saboda ana gudanar da bincike kan laifin da ake zarginsu kan aikata laifuka.” Cewar Abiodun.
