Mutane da dama ne ake fargabar an kashe wani sabon hari da aka kai da tsakar dare a yankin Yelwan Zangam da ke Karamar Hukumar Jos ta Arewa a Jihar Filato.
Wani mazaunin yankin, Yakubu Bagudu, ya tabbatar wa wakilin Aminiya cewa maharan sun kashe sama da mutum 30 farmakin da aka kai a daren ranar Talata zuwa wayewar garin Laraba.
Aminiya ta kuma gano cewa maharan sun kuma kona gidaje da dama a yayin sabon harin.
A lokacin tattaunawarmu da shi, Yakubu ya ce an girke jami’an tsaro a yankin.
Ya zuwa lokacin hada wannan rahoton dai, Rundunar ’Yan Sanda ta Jihar Filato ba ta fitar da wani karin bayani ba a kan harin.
An kai farmakin ne kimanin mako daya bayan an tare an kuma kashe wasu Fulani matafiya kimanin 30 a kan hanyar Gada-Biyu zuwa Rukuba a Karamar Hukumar ta Jos ta Arewa.
