An kama matashi da bindigogi da rigar Fulani a Kafanchan

Rundunar ’yan sanda a garin Kafanchan na Karamar Hukumar Jama’a ta Jihar Kaduna, ta samu nasarar cafke wani matashi da aka samu bindigogi a motarsa.

Matashin mai suna Geoffrey Ayuba, an cafke shi ne da misalin karfe hudu na yammacin Laraba bayan ya kai gyaran motar da bindigogin ke ciki a wani garejin gyaran mota da ke garin Kafanchan.

• An sace tsohuwa mai shekara 80 a Makarfi
• An ceto mutum 13 da ake shirin safararsu zuwa Libya a Kano

A kan haka ne wasu suka fara nuna alamar rashin gamsuwa bayan sun lura da take-takensa, inda ba tare da wata-wata ba aka kira ’yan sanda su ka yi caraf da shi.

Bayan wani dan takaitaccen bincike ne ’yan sandan suka gano bindiga kirar AK 47 guda daya, da wasu bindogogi kirar gida guda biyu da kuma rigar saka da aka fi sanin Fulani makiyaya na amfani da ita.

Wani jami’in tsaro da ya bukaci a sakaye sunansa, ya ce ana ci gaba da bincike a kan matashin da ya bayyana cewa shi mutumin Unguwar Rimi Bajju ce da ke makwabtaka da garin Kafanchan.

A cewar jami’in, ana gudanar da binciken ne don jin inda matashin ya samu makamin da ake zargin yana safararsu.