Matashin nan da ya caka wa mahaifiyarsa wuka ya kashe ta a Jihar Kano ya shiga hannun ’yan sanda.
Kamfanin Dillancin Labaran Najeriya (NAN) ya ruwaito kakakin ya ruwaito kakakin ’yan sandan jihar Kano, Abdullahi Haruna Kiyawa, yana cewa, “Matashin ya amsa abin da ake zargin ya aikata da kuma yin fataucin miyagun kwayoyi.”
- Allah Kadai Ya san jam’iyyar da zan mika wa mulkin Kano —Ganduje
- Sun kashe mai jego bayan karbar kudin fansarta sau biyu
Matashin mai shekara 22 ya kashe mahaifiyar tasa mai shekaru 50 ne ta hanyar sossoka mata wuka a sassan jikinta, saboda wata sabani da suka samu.
Daga nan ya cika wandonsa da iska, kafin makwabta su shiga su same ta kwance cikin jini, su garzaya da ita asibiti.
Aminiya ta ruwaito cewa matashin, wanda ake wa lakabi da Kwarangwal, ya yi wannan aika-aika ne a unguwar Rimin Kebe da ke Karamar Hukumar Ungogo ta Jihar Kano.
NAN ya ruwaito kakakin ’yan sandan jihar, Abdullahi Haruna Kiyawa, yana cewa rundunar ta yi nasarar cafke matashin a wata maboyar bata-gari da ke Karamar Hukumar Dawakin Tofa ta jihar.
Yadda abin ya faru
Yayarsa ta bayyana cewa, “Ya fi shekara rabonsa da zuwa inda muke, kwatsam sai muka ga ya shigo da misalin 5:30 ba yamma.
“Ya koma wurin mahaifinsa da zama a unguwar Kurna tun bayan da ya samu tabin hankali da har yanzu ba a tantance gaskiyar ba.
“Da shigarsa ya tambaya ina take, amma a lokacin ba a nan, amma ya ce a kira ta, tunda gidan makwabta ta je.
“Da shigowarta cikin farin ciki ta yi mishi maraba, ni kuma ina jin su; tana bude daki sai na ji ta yi ihu, nin kuma ina fitowa sai na gan shi da wuka.
“Ya yi kokarin kawo min hari amma na tsere, shi ne jama’a suka taru saboda yadda suka ga yana tafiya akwai alamar tambaya. A waje ya jefar da wukar ya gudu.
