Zargin batanci: Legal Aid ta ce ba za ta iya ba Abduljabbar kariya ba

Hukumar Agaza wa Shari’a ta Kasa (Legal Aid Council) ta bayyana cewa ba za ta iya bai wa Sheikh Abduljabbar Kabara kariya a shari’ar da ake masa ba.

Ana zargin Abduljabbar Kabara da laifin yin batanci ga Annabi Muhammad (SAW) da da kuma tayar da hankulan jama’a.

• Daliget ya raba wa jama’a miliyoyin da ’yan takara suka ba shi
• ’Yan Najeriya na kewar mulkin PDP —Mu’azu Babangida

Hukumar ta Legal Aid ta bayyana haka ne a cikin wata takardar da ta aike wa Babbar Kotun Shari’ar Musulunci da ke zamanta a Kofar Kudu a Jihar Kano bayan da kotun  ta umarci Hukumar da ta ba wa Abduljabbar Kabara lauyan da zai tsaya masa.

Haka kuma Hukumar ta bayyana cewa laifin da ake zargin Abduljabbar Kabara ba ya cikin laifukan da Hukumar take da hurumin ba wa kariya.

Sai dai wanda ake kara, Abduljabbar Kabara ya ce shi ba ma’aikaci ba ne don haka ba shi da takaimemen albashi.

Har ila yau ya zargi Hukumar da kin yin aiki da abin da addinin Musulunci ya sharadanta cewa, “Duk wanda ya nemi taimako a taimaka masa .

“Haka kuma ko da mutum yana kan ingarmar doki idan ya ce ba shi da wani abu to ya wajaba a ba shi,” inji shi.

Sai dai Abduljabbar Kabara ya nuna rashin amincewarsa da hakan, inda ya zargi gwamnatin da hada baki da lauyoyin don ganin burinta ya cika.

Ya ce, “Ina da bidiyon da Gwamna Ganduje da kansa yake bayanin cewa ya kai ni mayanka, to yaya zan amince da wanda ya yi waccan magana cewa zai ba ni wanda zai fitar da ni daga mayanka?”

Alkalin Kotun Ibrahim Sarki Yola ya bayyana cewa ya gamsu da dalilan da Hukumar Legal Aid ta bayyana don haka ya sallame su daga shariar.

Haka kuma alkalin ya ce bai gamsu da bukatar masu gabatar da kara ba cewa Kwamishinan Shari’a ya ba wanda ake kara lauya ba.

A cewarsa ba hurumin Kwamishinan Shari’a ba ne hurumin na kotu ne, inda ya kafa hujja da sashe na 349 (5) da na 389 a Dokar Hukunta Laifuffuka ta Jihar Kano (ACJL 2019).