Dan takarar gwamnan Kaduna a Jam’iyyar APC, Uba Sani, ya ce kafa ’yan sandan jihohi da bai wa masarautu ’yancin cin ganshin kansu ne kadai mafita daga matsalar tsaro.
Uba Sani wanda shi ne Sanatan Kaduna ta Tsakiya, ya yi alkawarin dorawa a kan ayyukan gwamnan jihar mai ci, Nasir El-Rufai.
- NAJERIYA A YAU: Ma’aikatar Shari’a ta fadi gwajin tsare gaskiya —ICPC
- Matar Shugaban DSS ta hana Abba Gida-Gida shiga jirgi daya da ita a Kano
Dan takarar ya ce ya yi damarar yin kabakin aiki musamman a bangaren ilimi, lafiya, harkar noma, matasa da kuma bunkasa sana’o’in mata.
Ya bayyana haka ne a ganawarsa da ’yan kasuwa, mata, matasa, manoma, shugabannin addinai, kungiyoyi da sauransu a lokacin taron masu ruwa da tsaki na Jam’iyyar APC a Kafanchan, Karamar Hukumar Jema’a ta jihar.
A cewarsa, kowa yana sane da yadda El-Rufai ya sauya fasalin jihar cikin shekara takwas, don haka yake da aniyar dora ire-irensu don inganta jihar.
Ya bayyana cewa gogewar da ya samu a majalisa ce ta ba shi damar yin takarar gwamnan jihar.
A nata jawabin, mataimakiyar dan takarar, Dokta Hadiza Balarabe, cewa ta yi zabar APC ba da tabbacin ci gaba da yin ayyukan alheri ne.
Ta ce manufar taron shi ne jin ta bakin daidakun mutane kai tsaye don sanin yadda za a magamce musu damuwa.
