Rundunar ’Yan Sandan Jihar Kano, ta kama masu kwacen waya 18 wadanda suka shirya kaddamar da hare-hare kan al’ummar jihar.
Kwamishinan ’yan sandan jihar, CP Usaini Gumel ne, ya bayyana haka a ranar Litinin.
- Mutum 12 sun rasu, 28 sun ji rauni a hatsarin mota a hanyar Kano
- An kama lakcara kan lalata da dalibansa don ba su maki a Yobe
Gumel, ya ce “Wadanda ake zargin gungun ‘yan wata kungiya ne da suka yi shirin kai wa jama’a hari .”
Kwamishinan, ya ce an kama barayin ne a wani samame daban-daban a a maboyarsu da ke jihar.
Ya ce an kama su ne a yankunan Mazaunar Tanko, Dandishe, Kofar Dan Agundi, Kofar Mata da kuma Filin Idi.
Sauran wuraren da aka gano a matsayin maboyarsu sun hada da Kofar Na’Isa, Kwanar Diso, Kukar Bulukiya da Dorayi Babba.
Ya ce, abubuwan da aka kwato daga hannun wadanda ake zargin yayin bincike sun hada da muggan makamai, kwayoyi da kuma tabar wiwi.
Gumel, ya ce za su gudanar da bincike a kan su domin samun bayanai da za su takmaka ga kama wasu da ke da hannu a fashin waya a jihar.
Ya kara da cewa, “Za mu ci gaba da kai samame don tabbatar da cewa Kano ta kasance cikin aminci da zama lafiya.”
