Rundunar ’yan sandan Jihar Kuros Ribas, ta tabbatar da ceto Hadimin Gwamnan Jihar Kuros Riba, Mista Oscar Ofuka daga hannun wanda suka yi garkuwa da shi a ranar Talata.
Kwamishinan ’yan sanda na Jihar, Kayode Sikiru Akande ne ya tabbatar da hakan a wata tattaunawa ta wayar salula da wakilin Aminiya.
Sai dai jim kadan da sace shin, ya ce tuni ’yan sanda suka sami nasarar ceto shi.
A cewarsa, hadimin ya shaki iskar ’yanci ne bayan jami’ansu da suka baza sun sami nasarar ceto shi.
Kwamishinan ya ce, “Mun sami nasarar ceto shi ’yan sa’o’i da sace shi.
“Ku ’yan jarida kun jima kuna zarginmu, yanzu kuma mun yi abin fada, ya kamata a yaba mana,” inji shi.
Sai dai wasu majiyoyi sun ce wasu jami’an ’yan sanda da ake zargin daga shalkwatarsu ta Abuja aka turo su ne suka dauke hadimin bayan an yi korafi a kanshi.
