’Yan bindiga sun sace daliban sakandire a Kaduna

Rahotanni sun tabbatar da cewa ’yan bindiga sun kai hari a kan wata makarantar sakandire mai suna Bethel Baptist High School a Jihar Kaduna.

Wakilinmu ya ruwaito cewa ’yan bindigar, wadanda suka kai hari da safiyar Litinin, sun sace dalibai da dama a sakandiren da ke Karamar Hukumar Chikun a Kudancin Kaduna.

• Mai kudin duniya Jeff Bezos ya ajiye aiki
• Majalisar Kano ta dakatar da Muhuyi Magaji Rimin-Gado

Maharan sun fasa gini daga wani sashe na katangar makarantar ta mata da maza ta inda suka samu damar shiga suka kuma sulale da daliban.

Wani bidiyo da wakilinmu ya nada ya nuna yadda iyayen daliban maza ta mata da sauran jama’ar gari suka taru a bakin makarantar cikin zulumi.

Iyayen daliban sun kuma tare babbar hanyar Kaduna zuwa Kachia domin nuna fushinsu a kan lamarin.

A wata hira da Shugaban Kungiyar Kiristocin Najeriya reshen Jihar Kaduna, Rabaran Joseph Hayab ya yi da sashen Hausa BBC, ya ce dansa na cikin daliban makarantar amma ya kubuta.

Duk da yake ba a san adadin daliban da aka sace ba, Rabaran Hayab ya ce “a ranar Juma’a mun kirga dalibai 180 da suka bangaren kwana, amma a safiyar nan yaran da muka samu ba su fi 24 zuwa 27 ba.”

Sai dai har yanzu hukumomi basu uffan ba dangane da lamarin.