Wasu da ake zargin ‘yan bindiga ne sun harbe wani direban motar haya, da aka fi sani da Baba Abu, sanan suka kuma yi garkuwa da fasinjojin motarsa a yankin Sabon Birnin da ke Jihar Kaduna.
Lamarin ya faru ne da misalin karfe 5 na Yammacin ranar Lahadi, yayin da direban ke kokarin sauke wani fasinja daga motarsa.
- ’Yan bindiga sun hallaka mai juna biyu a hanyar Kaduna
- Mutum 6 sun mutu a harin ’yan bindiga a Kaduna
- Sojoji sun aika ’yan bindiga lahira a Kaduna
Wani mai suna Umar wanda aboki ne ga direban da aka kashe ya shaida wa wakilinmu cewa “Bayan samun labarin faruwar lamarin, mun kira wayarsa amma ba ya amsawa, daga bisani kuma aka tabbatar mana ‘yan bindiga sun kashe shi.
Bayan jin ta bakin Umar, Aminiya ta gano cewar bayan bude wa motar wuta da ‘yan bindigar suka yi, sun kuma yi garkuwa da fasinjojin motar baya ga gawawwakin wasu mutanen da suka bari a kan hanya.
An masa sutura sannan aka birne shi da misalin karfe hudu na Yammacin ranar Litinin kamar yadda addinin Musulunci ya tanadar.
Wata majiya ta shaida Aminiya cewa bayan kai harin, ‘yan banga da ke yankin sun bi sahun ‘yan bindigar.
Sai dai a yayin neman jin ta bakin Kakakin rundunar ‘yan sandan Jihar domin tabbatar da ingancin rahoton, bai iya amsa kiran wayar da aka yi masa ba.
