’Yan bindiga sun sace dalibai akalla 10 a Karamar Hukumar Kachia ta Jihar Kaduna.
Gwamnatin Jihar ce dai ta tabbatar da labarin, inda ta ce ta samu rahoton hakan ne daga jami’an tsaro kan satar daliban.
- Kotu ta yanke wa mutum 2 hukuncin rataya a Kano
- Bayan sace ’yan mata 2 a jami’a, an fara gadin dakunan kwanan dalibai a Zamfara
Hakan dai na kunshe ne a cikin wata sanarwa da Kwamishinan Tsaro da Al’amuran Cikin Gida na Jihar, Samuel Aruwan, ya fitar ranar Talata.
Ya ce binciken farko ya nuna musu cewa an sace daliban ne a makarantar Sakandiren Gwamnati da ke Awon, a ranar Litinin.
Aruwan, ya ce kodayake har yanzu ba a kai ga tantance wurin da maharan suka kai daliban ba, amma suna kokarin tattara bayanai don gano ko lamarin ya faru ne cikin makarantar ko kuma a wajenta.
Kwamishinan ya yi alkawarin bayar da sanarwa a kai da zarar sun sami cikakkun bayanai.
