Wani magidanci a Abuja ya bukaci kotu ta raba aurensu da matarsa saboda tana barnar abinci.
A kotun a ranar Alhamis, magidanci ya matarsa ba ta iya tattalin abubuwa a gida ba, don haka ya nemi kotun da ke zamanta a yankin Jikwoyi, ta kashe auren don ya jefar da kwallon mangoro ya huta da kuda.
“Ko kadan matata ba ta san cewa abubuwa suna wahalar samu a kasa ba.
“Idan ta tashi yin abinci, sai ta girka fiye da kima, karshe sai dai a zubar,” in ji shi.
Ya kuma shaida wa kotun cewa matar na yawon gantali, ga rashin kula da yara, don haka, ya gaji da zama da ita.
A cewarsa, munanan halayen da matarsa ke nuna masa sun sa ya kamu da lalurar hawan jini.
A nata bangaren, matar ta musanta zarge-zargen da maigidan nata ya yi mata.
Bayan sauraron duka bangarorin, alkalin kotun, Labaran Gusau, ya dage shari’ar zuwa ranar 17 ga Nuwamba.
