Wani mutum ya cinna wa gidan masoyiyarsa wuta ya kuma aika ta lahira tare da ’ya’yanta biyu.
Wasu ’ya’yan matar su uku kuma sun samu mummunar kuna a sakamakon wutar da mutumin ya sa wa gidan da tsakar dare, inda a halin yanzu ake jinyar su a Asibitin Anglican, Molete.
- Ramadan: Hanyar magance sabanin ganin wata —Farfesa Mansur
- Ana zargin Tambuwal da haddasa rikici a jam’iyyar PDP
- Ramadan: Za mu kwace lasisin duk wanda ya kara farashi —BUA
- Matashi ya fille kan kakarsa ya kai ofishin ’yan sanda
Matar tsohuwar daduron mutumin da ake zargi da kashe ta ne a unguwar Idi-Arere na garin Ibadan, Jihar Oyo.
Suna tsaka da zamansu na daduro ne ta rabu da shi, matakin da ya fusata shi, ya kai shi ga yin barazanar kashe ta; Daga baya ya faki ido cikin tsakar dare ya yi aika-aikan.
Wanda ake zargin, shi ma ya yi mummunar kuna a sakamakon wutar da ya cinna wa gidan, wadda kuma ta yi sanadiyyar mutuwarsa.
Kakakin ’yan sandan Jihar Oyo, CSP Olugbenga Fadeyi, ya ce, “Zaman daduro suke yi; mutumin ya kona gidan tsohuwar farkar tasa ne saboda ta nemi rabuwa da shi.
“Wutar ta kashe matar da ’ya’yanta biyu; shi ma mutumin ya mutu daga baya, sauran yara uku da suka samu rauni kuma ana jinyar su a asibiti.”
Ya ce ’yan sanda na gudanar da bincike kan abin da ya faru domin gano hakikanin lamarin.
