Tartsatsin taratsin tinkaho
Tantagaryar tattaunawar tarho
Taho-taho
Tumfafiya tai toho
Tawayar tangaraho
Batun buhun bankare baho
Gingimemen garmaho
Balli-ballin tsinin kaho
Tsuwwar dan tsakon bakin shaho
Takun tattakin taho-taho
’Yar gatan Iya-talle
Maman-tine ta sake lale
Lanhonta kamar an kyale
Batun ga ko an daddale
A ce nai tsurku a gidan Baballe
Kurtun maganar walle-walle
Kade-kade da tsalle-tsalle
Sai an buga kidan talle
’Yan wasa an yi adon kyale-kyale
Zillaziyya na zille-zille
’Yan sisi
Hukuma tai kwafsi
Ana ta kwasar asi
Layin waya mai jefa wasi-wasi
Dole ne a bi ba’asi
Garmar tunkude talauci
Asusun masu fatauci
Lalitar masu dukanci
Tara matsabbai akwai azanci
Baba dai ya hana cin hanci
Wasu na ta dabbanci
A daina yi wa juna batanci
Sara-sukar iskanci
Sha’anin shawaraki shashanci
Keta doka na sa a shiga kunci
An cefanar mini layi
An sanya ni laulayi
Salalar salular layi
Ina ta samun wayoyi
Lallai labin ga na da kayoyi
Gaye mai hululu
Ya bijiro min da batun Kulu
Ko yana nufin mai sakar ulu
Ina Jamila da Jamilu
Mu je gaban Malam Sahlu
Ana ta dumbuzo mini matsabbai
Adadinsu ya dara kwabbai
Kar fa a nunke ni a baibai
Na san Dabai
Ba na karyar sanin Dubai
Wata ta yasar da waya
Kawaye na ta bibiya
’Yan lalle na ta tambaya
Lambar kulu ce tai zirya
Mai tagwayen suna ta shige kurya
Nanu nunin Fadima
’Yar makaranta mai himma
Ki kara kwazo da azama
Ki zanki sanin makama
Kwarewarki za ta taimaki al’umma
Bobo karamar Dodanniya
Fici da Nanawo ’yan uwa
Neman ilimi ba a kuwwa
Sai fafutikar kokowa
Yaki jahilci a Haurobiya
Malam Na-kwaciri
Ja na-zomon adon gari
Su daina tsirfa iri-iri
Kar su afka garari
Batun ingarma a fito sarari
Cikin watan Noman-Baba na shekarar da ta rare a guje, wato dubu karamin lauje da silin madambaci, kurtuna na halo alalo ya samu tangarda, don haka sai na sake sayen wasu layuka, na Iya-talle da Maman-tine na makala a sabon kurtun yin batu, amma abin mamaki har cikin shekarar nan ta dubu karamin lauje da sili da manuniyar kasa ba a daina laluben wadannan layuka nawa da zimmar neman adon-gari, Mai tagwayen suna; wata rana kuwa aka bijiro mini da bukatar layin salular Kululu, amma fa ba Mai-tuwo uwargidan Lado ba.
Wadannan lamura da ake ta tsuwurwurta mini a cikin kurtun maganata sun sa na yi ta hankoron cafke ’yan wala-wala, masu walle-walle, suna ta tsalle-tsalle, kamar ana yi musu kidan talle. Idan kuwa ba su ba ne, ai sai a ce ko tangardar tangaraho ce, ko kuma gangin gingimemen garmaho ne. Haurobiyawa hakika Adon-gari da ’Yan lalle ne ke yi mini tumbalale-tumbalale. Ta yiwu kuma masu laluben Santaleliyar Santala ce ko Santalele Salele.
Tartsatsin taratsin tinkahon tattaunawar tarho ai sai iyayen al’umma, musamman a zamanin da koshiyar Na-talle ke sharafinta, kafin Baba-ojo da kanensa su cefanar da ita; kodayake yanzu ma Adon-gari da ’Yan lalle na baza batutuwa a cikin kurtun halo alalo, har da tsirfa iri-iri. Wadannan batutuwa buhu-buhun bankare baho da suka cika mini tumbi sai na sanar da Malam Na-kwaciri, shi kuwa tuni ya yi nazari, inda ya fasko cewa wasu ne suka afka cikin garari, don haka suke ta laluben abokin balaguro.
Wani abin ban ta’ajibin ma, shi ne har GARMAR TUNKUDE TALAUCI ta tunkudo mini sakon Allah Ya raya, don murnar zagayowar ranar haihuwar Mai tagwayen suna ’yar Haruna, amma dai har yanzu ba su jinko mini damin matsabbai; ko sakon ankararwar shige da ficen matsabbai a asusun Mai tagwayen suna ba.
’Yan makaranta kai har damin matsabban yin batu aka yi ta antayo mini a wadannan layuka salula. Abin da na guda dai irin wancan Man-kazar na bayan kangon Amintacciyar jaridar kasar Haurobiya ne ya samu wannan gwaggwabar garabarasa, ai sai cin gurasa, ko ma ya kan ga gilashi ya yi ta yaren Ingilishi kamar yana cin kilishi. Idan kuwa DAN GIDAN Mai motar Roba ne ya samu wadannan layukan burga da baragada zai rika yi wa adon-gari, irin na ’yan bokoko; BOBO DA KWAMBO SAI DAN BOKO. Watakila ma ya rika yi musu burga da cewa ya san suna motar kawunsa kamar yadda aka taba bayyanawa a farfajiyar wannan makaranta, wato ROBORIOUS MOTORIOUS – RUBBER ROBOTIC MOTORISED CAR.
Batu dai na ingarman karfen karafan layin tarragon titin dogo, ba tare da bata lokacin wulwulawar agogo ba, Malam Na-kwaciri ya yi nuni da cewa ’YAN SISI ce ta yi kwafsi, inda ta bari Maman-tine ta cefanar da layin MAI TAGWAYEN SUNA, bayan da ta yasar da shi na tsawon lokaci. Shi ma na Iya-tallen, tunda hawainiyar kurtun magana ce ko tantama babu na wani ne ko wata aka cefanar mini bayan da aka dauki tsawon lokaci ba a ji BAMBAMIN BATUTUWA BA!
Baban-burin-huriyya a umarci Iro mugun madambaci ya durfafi masu damfararar damun fura a kurtuna magana, tun kafin su damalmala al’amura, musamman daidai wannan lokaci da Haurobiyawa ke tunkarar ZABABBAKAR ZABUKAN shekarar dubu karamin lauje da silin manuniyar kasa. Kada mu yi kasa a gwiwa wajen nusar da hukuma masu tsiwurwurta ta’asa a kwanon tasarsu!
