Dakarun Najeriya sun halaka ’yan bindiga guda shida tare da kwato babura 34 a harin jirgi da suka kai maboyar ’yan bindigar a kan tsaunin Komani da ke Karamar Hukumar Zurmi a Jihar Zamfara.
Sojojin sun kama wani dan bindiga a garin Talata Mafara inda suka kwace makamansa suka kuma kama wani dan leken asirin ’yan bindigar a garin Gusau.
Mukaddashin Darekta Yada Labaran Rundunar Tsaro Birgediya Benard Onyeuko ya ce wasu daga cikin ’yan bindigar sun tsere sun bar makamansu.
Ya ce sojojin na rundunar Operation Sahel Sanity sun kuma fatattaki mahara da suka yi yunkurin satar shanu a kauyen Kasele da ke Karamar Hukumar Batsari ta Jihar Katsina.
“Sun gaggauta isa wurin, lamarin da ya sa barayin shanun tserewa, amma daga lokacin sojojin suka ci baga da zama a kauyen”.
