Fitaccen malamin addinin Musuluncin nan na kasar Masar, kuma Shugaban Kungiyar Malaman Addinin Musulunci ta Duniya, Sheikh Yusuf Al-Qaradawi, ya rasu.
An sanar da rasuwar tasa ce ranar Litinin a shafinsa na Twitter yana da shekara 96.
- Ya ‘sace’ wayar dan sanda a caji ofis lokacin da ya je neman beli
- Cutar ‘Haukan kare’ na kama ’yan Najeriya 55,000 a duk shekara – USAID
A baya dai malamin ya yi suna wajen gabatar da wani shiri mai suna “Shari’a da rayuwa” a gidan talabijin na Al-Jazeera.
Shirin dai na ba musulmi dama daga sassa daban-daban na duniya su bugo waya don ya ba su fatawoyi a kan abubuwan Musulunci iri-iri.
Malamin na cikin wadanda suka caccaki sojojin da suka yi wa zababben Shugaban Kasar Masar na farko, Mohammed Morsi, juyin mulki a 2013.
Sheikh Al-Qaradawi dai dan asalin kasar Masar da ke zaune a Qatar, kuma rasuwarsa ta jawo kaduwa daga Musulmai daban-daban a fadin duniya, musamman a kafafen sada zumunta na zamani.
Malamin dai ya wallafa littatafan Musulunci sama da 120 da kuma kasidu da makaloli sama da 60.
