Ciwon shawara
Dumuiniyuar hawan kawara
Camamar cin awara
A warware a yi kakara
Kuroda-bata- ’yan kura
Ban a karatun kwandasta
Ballantana takun tatata
A wajen inganta uwar jikin maza da mata
Masu inshore na wasan karta
Ana ta kata-kata
Baban-burin-huriyya
Kai da Usainin-Babajo
Ku hana zubin ajo
A wajen inganta uwarjikin su Hajo
Da daukacin mutanen Haurobiya
Takun filfilon kafili
In shora sai mai hali
A dai rika aiki da hankali
Kada a sari talaka da kansakali
Bala’I na ta yi masa balbali
Hukumar ’yan hayis wadda ta yi mirsisi a hayin sisi wajen lallaga sisi a harkar kula da uwar jikin al’ummar Haurobiya, wadda ke ta tsuwurwurta hada-hadar inshorar sha’awar cin shirwa, tare da da ka wawar shirmen sharbar shawarmai wajen jikkata al’umma a farfajiyar Bokan Turai ta fara cukudi-cukudin cin kudi, fiye da yadda ’yan kasar Sin ke cin kwadi, tare da dandana wa al’umma kudarsu. Wannan hukuma ta samu tasgaron tumadugayya ne lokacin da shugabanta ya sa zare da ministan kula da ingancin uwar jiki.
karfa-karfar giwa a dawa ya jefa Haurobiyawan da ke hada-hadar inshorar ’Yan Hayis cikin halin kaka-ni-ka-ka-yi. Domin idan ka jinka musu ’yan matsabban da ake yanke wa a ladar kwadago, sai su jibge a kango, amma ba na GizBaba ba. Idan kuwa an ce katafaren kangon GizBaba ne, to sai in ce ai dama Malam Mai yaren Hau-hau wajen hawan sa ba tare da sain-sa ba, ya ce: Gizago ba ka da sabo.’
Kai akwai lokutan da idan na ziyarci farfajiyar Bokan Turai sai a ce babu ni a jerin sunayen wadanda ake kula da su. Kuma na samu labara daga Bokan Turai, wanda ya ce ka da ion bayyana ko shi wane ne, cewa, ‘ ba lallai a bai wa mai hada-hada a wannan tsari cikakkiyar kulawa ko managartan magunguna ba. Don haka ya shawarce ni da in kulla kyakkyawar alaka damnmagori da ’yar mai ganye, ta yadda zan rika fitowa fes-fes dan gaye, babu batun wani waye-waye, ballantan a sa ni hawaye.’
Batu na ingarmanm karfe-karafan titin tarragon kwangirin dogo, mun gaji da hatsaniyar shan kashi a hannun ‘’YAN HAYIS, masu lallaga sisi a HAYIN SISI, suna cusa wa jama’a wasi-wasi, a harkar lankwaya laulayi uwar jiki, ta yadda in an murmure za a kwata kamun ludayin kandamo kunun kanwa da kokon kokon da aka dama da kullun garasa, har mu ji dadin samun gudajin gaya, mu iya aikin gayya ba tare da hatsaniya ba. Tuni dai na fasko jirgin ’yan hayis, tun da nasa cewa, ai ba masu kiran jama’a su shiga a kai su KURODA, BATA, ’YAN KURA KO ASIBITI GARI KASUWA BA, a’a, wadannan jami’an hukuma ne da suka kware, suka karkare suka karke da SHIRMEN SHA’AWAR SHARbAR SHAWARMA SHIRU!
Malam ya ci shirwa shiru! Kai inshorar inganta uwar jiki ta zama ciwon shawara ko kumburin mara mai haifar da asara. Bokan Turai a gyara, don jama’a su samu su sarara. Ka da mu bari mniyagu su ci gaba da kasura. ’yan lele a daina aikin tabara; shafaffu da mai ku ne kuka gagara, mun ga manyan kadangaru masu fasa mana garu, sun bar mu na-mujiya kuru-kuru!
Haurobiyawa lallai wainar da ake toyawa a wannan hukuma ba da dadi, ballantan a yi mugu barbadin magani da ita a duk sa’adda kuka yi fama da laulayin uwar jiki. Don haka nike ganin akwai bukatar Farfesa Yayan-ummi Usainin-Babajo ya yunkura wajen yi mata garambawul. Sannan a tabbatar an a bai wa al’ummar da suka kutsa kai cikin tsarin ’Yan Hayis managartan jike-jike sa sayu da garin magani. Kai kam ata ya yi ma a duba yiwuwar kwaikwayon tsarin tsohon shugaban Amurkawa Uban-Mama, wato UBAN-MAMA MAI KIYA-KIYA, don ta haka ya yi ta fafutikar kula da liyafar uwar jikin al’umma har ya karkare wa’adin mulkinsa.
Mahanga ta karamin lauje, ina aganin akwai bukatar masu hada-hadar INSHORAR TAKAFUL, wadanda aka baza labarinsu a ra’ayin Amintacciyar jaridar kasar Haurobiya ta makon da ya arce, wato su zo su fara hada-hadar kula da uwar jikin al’umma, inda aka baje bayyanai kan yadda ake RIBA DA ASARA!
Lallai in aka kyale Kamfanonin kamfatar jike-jiken sayun tarairayar inganta lullumin lumanar uwar jiki suka ci gaba da SHIRMEN SHA’AWAR SHARbAR SHAWARMA SHIRU, to Haurobiyawa na iya kamuwa da ciwon shawara, a yi ta yi musu dumuiniyar hawan kawara don a warware a samu warwara a wajen cin awara a hayis mai kara-kainar KURODA-BATA-‘’YAN KURA. Haurobiyawa sai a yi HATTARA!
