Mutum 90 ne aka sallama a ranar Juma’a 12 ga watan Yuni bayan sun warke daga cutar COVID-19 a jiha Legas.
An sallami mutanen ne sun koma cikin iyalensu daga cibiyoyin killace masu cutar guda bakwai a jihar.
Mutum 1,137 nan yanzu suka warke daga cikin wadanda suka kamu da cutar coronavirus a jihar Legas inda cutar ta fi kamari a Najeriya.
Gwamna Babajide Sanwo-Olu ya ce mutanen da aka sallama din bayan gwaje-gwaje sun tabbatar da sun warke sun hada da mata 30 da maza 60.
Sanwo-Olu ya jinjina wa ma’akiatan lafiya kan irin jajircewar da suke nunawa wurin yaki da cutar ta COVID-19.
Ya kuma bukaci jama’ar jihar da su ci gaba da bayar da hadin kai ta hanyar bin matakan kariya wanda shi ne babban mafita daga kamuwa da cutar mai yaduwa.
