Gwamnatin Tarayya ta ce tana sa ran a makon nan da za a shiga kungiyar malaman jami’a ta ASUU za ta janye yajin aikin ta tsawaita.
Gwamnatin ta ce tana kyautata zaton tattaunawar da ta yi da ASUU za ta haifar da kyakkyawan sakamako, kamar yadda kakakin ma’aikatar kwadago, Olajide Oshundun, ya sanar a ranar Juma’a.
- Gani ya kori ji: Hotunan muhimman abubuwa a wannan makon
- Rikicin Ukraine ci gaban Yakin Duniya na Biyu ne – Putin
Ministan Kwadago, Chris Ngige, ya ce, “Mun tattauna ta yadda kowa ya tafi yana murna. Mun cim ma matsaya kuma muna fatan nan da mako mai zuwa, komai zai daidaita,” a cewar sanarwar.
Ya kuma ce, “Mun yi muhimmiyar tattaunawa; mun yi duba kan al’amuran da ba a so kuma mun yi yarjejeniya, kuma hakan ya gamsar da duk wanda ya halarci taron.”
Sanarwar ta ce Ngige bayyana hakan ne a tattaunawarsa da ’yan jarida bayan kammala wata tattaunawa da gwamnati ta yi da ASUU a Fadar Shugaban Kasa.
ASUU da Kungiyar Manyan Ma’aikatan Jami’a ta Najeriya (SSANU) da sauran kungiyoyin kwadago na jami’o’in gwamnati, sun shiga yajin aiki sakamakon gazawar Gwamnatin Tarayya wajen biyan bukatunsu.
