Rahotanni sun bayyana cewa mayaka masu ikirarin jihadi na kungiyar ISIS a Yammacin Afrika (ISWAP), sun yi garkuwa da daruruwan mutane a Jihar Borno.
Kamfanin Dillancin Labarai na AFP ya ruwaito cewa, mayakan a ranar Talata sun kai mamaya kauyen Kukawa da ke gabar Tabkin Chadi, inda suka rika yi wa mutane dauki dai-dai.
Harin ya auku ne a yayin da mazauna Kukawa suka dawo gidajensu bayan shafe shekaru biyu a sansanin ’yan gudun hijira na Babakura Kolo.
A watan Yunin da ya gabata, akalla sojoji 20 da fararen hula 40 sun rasa rayukansu yayin da daruruwan mutane suka jikkata a wasu tagwayen hari da mayakan suka kai a yankin.
Haka kuma a watan Yunin ne dai mayakan suka kashe akalla mutum 81 a wani mummunan hari da suka kai wani kauye a Karamar Hukumar Gubiyo ta Jihar Borno.
