Majalisar Dattawa ta tantance mutum bakwai da Shugaba Bola Ahmed Tinubu ya aike da sunansu don amincewa da su a matsayin sabbin ministoci.
Majalisar ta shirya tantance Dokta Nentawe Yilwatda, Muhammadu Maigari Dingyadi, Bianca Odinaka Odumegwu-Ojukwu.
Sauran sun haɗa da Hon. Yusuf Abdullahi Ata, Idi Mukhtar Maiha, Dokta Jumoke Oduwole, da Suwaiba Said Ahmad.
Tantancewar ta gudana ne a zauren majalisar bayan ɗage zamanta da ta shirya yi a ranar Talata.
Idan za a tuna a makon da ya gabata ne, Shugaba Tinubu ya sauke ministoci shida, sannan ya sake naɗa wasu bakwai.
Kazalika, ya sauya wa wasu ministoci 10 ma’aikatan da za su ci gaba da aiki.
Majalisar na tantance mutanen ne bisa ƙarƙashin sashe na 147 na Kundin Tsarin Mulki Najeriya na shekarar 1999 (wanda aka yi wa kwaskwarima).
