✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Majalisa ta amince da dokar tsayawa takarar indifenda

Hakan zai ba daidaikun mutane damar tsayawa takarar kujerar shugaban kasa da gwamnaoni da shugabancin kananan hukumomi ko wakilici a majalisar dokoki

Majalisar Dattawa ta amince da dokar halasta tsayawa takarar zabe ba a karkashin kowace jam’iyya ba a Najeriya.

Amincewar Majalisar da kudurin zai ba wa daidaikun mutane masu cin gashin kansu damar tsayawa takarar kujerar shugaban kasa da gwamnaoni da shugabancin kananan hukumomi ko wakilici a majalisar dokoki ba tare da jam’iyya ba.

A zaman majalisar ta ranar Talata, ta kuma amince da kudurin dokar sanya Shugaban Majalisar Dattawa da na Majalisar Wakilai a cikin mambobin Kwamitin Tsaro na Kasa.

Ta kuma umarci Akawun Majalisar Dokoki ta Kasa da ya gabatar da kudurorin biyu da ta kammala karatu da kuma amince da shi ga Shugaba Muhammadu Buhari, domin sanya hannu.

Wannan dai na zuwa ne mako biyu kafin karewar wa’adin majalisar da shi kansa Shugaba Buhari.

Dokokin biyu na daga cikin sauye-sauyen da aka yi wa kundin tsarin mulki da aka aike wa Fadar Shugaban Kasa a karshen shekarar da ta gabata.