‘Yan bindiga sun kai hari garin Okofi na Karamar Hukumar Katon-karfe, Jihar Kogi, sun kashe babban limamin garin, Hussaini Mundi, da wasu mutum hudu.
Wani mazauni garin, Zubairu, ya ce lamarin ya auku ne da misalin karfe 5:56 na safiyar Alhamis bayan an fito daga sallar Asubahi.
Ya ce, ‘yan bindigar sun shigo garin suka yi harbi kan-mai-uwa da wabi.
Zubairu ya ce, limamin ya fito daga babban masallacin garin ne bayan kammala sallar Asuba ‘yan bindigar suka bude masa wuta, ya kuma mutu nan take.
Ya ce harbe-harben ‘yan bindigar ya kashe wasu kananan yara guda biyu
“Abun tausayi, wasu matasa biyu da aka kai asibiti sakamakon harbin bindiga sun mutu a can”.
Ya ce, ‘yan bindigar sun tsere bayan kisan da suka aiwatar.
Ya ce, an yi wa limamin salla a fadar Sarki Ohimegie na Masarautar Igu-Kotonkarfe, Alhaji Abdulrazak Isah Koto, a garin Koton-Karfe.
Kakakin ‘Yan Sandan Jihar Kogi, DSP Williams Aya, ya tabbatar da aukuwar lamarin, ya kuma ce mutum uku sun rasa rayukansu a garin na Okofi.
Ya kuma ce rundunar na kan binciken lamarin.
