Magoya bayan kungiyar kwallon kafa ta Kano Pillars za su ci gaba da karfafa gwiwar ‘yan wasan su ta yadda kungiyar za ta cimma nasarar lashe gasar firimiya ta bana. kungiyar ta tabbatarwa da ‘yan wasan cewa magoya bayan kungiyar za su bi su duk inda suke yin wasa domin ba su karfin zuciyar buga wasa walau a gida ne ko kuma waje.
Wannan albishir ya fito ne daga bakin Shugaban kungiyar magoya bayan kungiyar ta Kano Pillars , Alhaji Bashir Mu’azu Jide a zantawarsa da Aminiya, bayan kungiyar Kano Pillars ta doke kulob din Ifeanyi Ubah a filin wasa na Sani Abacha dake kofar Mata a ranar Lahadin data gabata.
Shugaban ya jinjina wa ’yan wasan kasancewa sun fara gasar firimiya ta bana da kafar dama, inda ya hore su da su cigaba da nuna kwazo don ganin sun sake lashe gasar a karshen kakar wasa ta bana.
