Lankwasar labi
Lalubar lakabi
Lilon li’rabi
Lallami da ladabi
A dai alkinta adabi
Mikakkiyar hanya
Murgudawar juya
Muskutawar kurya
Tarden tallafar kwarya
Zagaye=-zagayen zirya
Zabarin zamiya
Zalamar zilliya
Zakwadin zumudin tsiya
Zarge-zargen azargagiya
Zanzaron zaren zargiya
Karkarwar katantanwa
Kalume-kalume kanwa
Karon-battar kokowa
Kayi da kifawa
Kilisar salon sukuwa
Zirga-zirgar zabi
Zazzafan zazzabi
Zogin kuibi
Zungurun zabi
Zazzagar zubi
Tsororuwar tsauni
Tsagwaron tsanani
Tsimayin tsammani
Tsinken tsikaro tsini
Tsalle-tsallen tsakani-tsakani
Laulayi laulawa
Langa-langar laulayawa
Lulun luluwa
Laftun laftawa
Laujen lankwayawa
Kwalliyar dubi
Hasken fuska a madubi
Dinka tufafi sababbi
Ai kwalisa ba sababi
A ci dan iccen inabi
Kauce-kaucen kurciya
Hargagin hasbiya
Mikar mikiya
Tumbin tunkiya
Kndagarkin kariya
Nauyayya da hauhawar kalamai
Kimar manufa takamaimai
Fadar gayauna da maimai
Sana’ar na-duke a daure dammai
Falke ya nunke fama-famai
Rabu da rubdugun rububi
Karambanin kinbibi
Bude sabon babi
A cikin kitabi
Akwai hanin aikata aibi
Tulelen tumbi
Kululun kusumbi
Tokarar takobi
Kankanbar rikon kanbi
Takun tattaki bi-da-bi
Tarin tambayoyi
A allo akwai ayoyi
Akai ai ta yi
Ci gaba da daukar nauyi
Har a daina layi
Masana
Ai Magana
Ga alluna
An yi musu zayyana
Don fahimtar maganin fitina
Komai a kaishi muhalli
Ba tsangwama balle isgili
Ko tsugudidi tsilli-tsilli
Keke-da-keke ai tozali
Don hana cin zali
Na doka dan misali
A fasko masu hankali
Gini a shata shi da tubali
A daina tashin balli
Cikin lumana an warware kulli
Rigimar burtali
Dawo da haraji da jangali
Makiyaya ce muhali
Bisdashe dukiyar mai hali
Ai tanadin tattali
Lullumin lumana lullum
A daina tada bindiga durum
Balle kwaramniya kwararam
So ake a ji shiru kurum
Bakinku alaikum
A tsarin nauyayawa da hauhawar kalmomin kalallame kalamai, don tabbatar da manufa takamaimai, akan yi lankwar lilon li’irabi, don jin dadin Zubi labi-labi. A wani loton ko an tafi a mike babu kanta-karya ko karairaya, sai an lankwaya don sauke kaya. Don haka sai mu bi kafin kayan DAKON DAKON MANGALAR AURA da ake tsiwurwurtawa a wannan zamani, musamman a kasar Haurobiya.
Haurobiyawa a bi hanya mikakkiya, ta yadda batutuwan ingarman karfen karafan titin tarragon kwangirin layin dogo za su kasance babu tawaya. Mu hada karfi da karfe wajen tunkarar balaguron zamani, ta yadda za a nusar da FULLO tsarin kiwon bisashe irin na Danniyar-maki, har ta kai ga ya yi wajen shayarwarsa a masaki, shi ke nan babu sauran hargagi. Su kuwa masu tayar da yamutsi ko da na HARAMTA BOBO DA KWAMBON BOKOKO ne, wajibi ne a himmatu wajen nusar da su cewa sun baude wa tafarkin Mai-duka, Mai-kowa, Mai-komai
Lallai masu wasan Samson-siya-siya da kwakwalwar talakawan kasar ya kamata ku fasko cewa kun kudiri manufofin warware tsilli-tsillin matsalolin al’umma, har ta kai ga an manta da TSAUTSAYIN TSIMAYIN TSALLE-TSALLEN TSAKANI-TSAKANI; ko KWAKWAZO DA KWARAMNIYAR KURUM, al’amarin da ka iya haifar da tashin bindiga durum ko ma ai ta wasan ’yar burum-burum, ta yadda da wuya mutane su ja bakinsu alaikum.
’Yan makaranta masu koyon watsattsake da falle shafukan mujallu da makalu a farfajiyar Dodorido da ke cikin Amintacciyar jaridar kasar Haurobiya, lallai ku kasance masu kakaba wa masu Dawurwurin Dumuiniyar Dama-dama-da-kurda-kurdar siya tagiyar MALAM TUNAU, ta yadda za su yi wurgi da ta MALAM MANTAU, musamman a daidai lokacin da zabi-sonka na shekara ta dubu karamin lauje da sili da manuniyar kasa ke karatowa. Dole ne a ja na-mujiyar wakilan rafkiya, har ta kai ga sun fara famfarar famfare aiki fafur.
Su kuwa Majalisin Tsofaffin kasar Haurobiya, wadda a halin yanzu Saurin-kirinki ke watangaririya da ita, lallai mu rika tabbatar da cewa mun tura masu hankali a jika, ba mahankaltan hannun taguwa ba.
Aiwatar da managartan tsare-tsare, tare da kare-karen hare-hare, shi zai damar mu tsalle shinge haure-haure da hauragiya a kasar Haurobiya.
Gwamnatin Baban-burin-huriyya da Usainin-Babajon Haurobiya, wajibi ne a taka wa magabtan magabatan, wadanda ke tattakin LANKWASAR LABI a tsarin tafiyar da harkokin al’umma, don tabbatar da LULLUMIN LUMANA LULLUM; a daina KWARAMNIYA KWARARAM, don so a ke a jiSHIRU KURUM; kowa ya ja BAKINSA ALAIKUM!
Lallai ’yan watanda, wadanda ba sa kishin kasa, sai kisisinar kishiya kamata ya yi a hana su Zabarin zamiya da Zalamar zilliya da Zakwadin zumudin tsiya da Zarge-zargen azargagiya da Zanzaron zaren zargiya, ballantana su karke da Karkarwar katantanwa da Kalume-kalume kanwa da Karon-battar kokowa, har ai Kayi da kifawa ko Kilisar salon sukuwa!
Jiki dai magayi bankar hayakin bukin tunkurar Dan-Korau!
