Cikin watan Yawon wullin wannan shekara ta dubu karamin lauje da sili da madambaci na hadu da masu cinikin KWAKIN TELA, wadanda suka nusar da ni yadda ake shata kusurwar kafa tubali don ginin dakali ko dandamali da kyakkyawan halin kange dukiya daga fatali, musamman a wannan lokaci da masu ha’inci kan keta wa mutum taguwar mutunci, ta yadda in sun jefa wani rukuni na al’umma cikin kunci sai su rankaya zuwa maboyar batan-baka-tantan.
Wanda ya kutsa kai cikin hada-hadar huldar cinikin KWAKIN TELA, tabbas zai yi ta kWAkWAR TALLA, tare da kULLA-kULLA marar ILLA don shawo kan ’yan WALA-WALA. Sannan a yi cinikin katin yin batu a kurtun halo alalo, don balaguron ninkayar zamani salo-salo.
Kai a tsarin ciniki KWAKIN TELA, wanda aka dade ana ta yi mana TALALAR TALLA, har da karajin SHELA, na fasko cewa kamfanin DISKON DUHUN DUNdUM DURUNdUM, wanda ya alkawarta rikida zuwa MAbUbbUGAR HASKAKA HAUROBIYA yana cefanar da katin zukar mamakashin lantarki, kuma daidai kullin matsabbanka, daidai shagalar shagalinka, wato dai BA CUTA, BA CUTARWA.’
’Yan makaranta masu samun horon watsattsake da fallen shafukan wagagen littatafai da mujallu da jaridu a farfajiyar Dodorido da ke Amintaciyar jaridar kasar Haurobiya, lallai ya kamata ku kakaba wa na-mujiyarku tabaron hangen nesa don fasko irin dasisar masu DAMFARAR DAMUN-FURA da ke DAMA-DAMAR DAMALMALA AL’AMURA a harkokin kasuwanci, har ta kai ga sun haifar wa ’yan kasuwa KASO-KASON-WAWANCI, musamman ma idan an yi hadin gwiwar makirci tsakanin KAMFANONIN KAMFATAR KUdI da masu kudin samara.
Kuma a farfajiyar wannan makaranta mun sha nusar da al’umma yadda miyagu suka yi wa al’ummar kasar nan WA-KA-CI-KA-TASHI a kulla-kullar ciniki da ta haifar wa dimbin mutane zubar da kwalla. Domin wajibi ne mai ’YAR TSALA idan ta sauke KWALLA ta tabatar da cewa ta karbi KWANDALA, ta yarda babu wanda zai TSALA mata BULALA, balantana ta zo tana LALALA!
Batu na ingarman karfen karafan kwangiri titin tarragon dogo, lallai rago ba za ya iya karo da karon rago-da-rago ba. Saboda haka mu daina neman GALALA don dinka GALLELLIYA GALILA. Al’amari mafi a’ala dai kamar yadda muka sha nusar da Haurobiyawa, shi ne, SILA TA FI SALSALA DA SALALA. Ka ga ke nan idan BA A SULALE DA SULALLA BA, kowa sai ya SAKATA YA WALA, har ma WALWALA.
Bisa la’akari da yadda ’yan WALA-WALA suka dade suna cin kolonsu babu babbaka a kasar nan, shi ya sa muka yi ta kwakwazon ganin an cafko masu HALIN-BURTU, wadanda suka batar da kama suka yi ta tafka barna. Kai hatta BASUSSUKAN WUNI-WUNIN ’YAN UWAN DA BA SU DA WANI an taba bijiro da su a dandamalin darasin wannan makaranta.
Uwa-uba dai mun bankado mummunar asarar da aka haifar wa al’umma a wajen tsuwurwurta dabarbarun damfarar damun fura da kan haifar wa mutum furfura har ya ji ya yi yunkurin tashin tsuntsu fur!
Kun ga ke nan matukar muna son tsira daga tsirin tsiyatakun ’YAN WANKI ko da a SHAFUKAN MASHAkATAR LILO DA TSALLAKE-TSLLAKEN NA’URA MAI kWAkWALWA ce, lallai sai mun yi kokarin kwarewa a dabarun saye da sayarwa bisa doron tsarin cinikin KWAKIN TELA, tunda a jerin manufofin kwadon kwakin tela ko KWAKWAZON TATTALA TULIN DUKIYA, an ce za a iya bude ASUSU, ta yadda kudin da mutum ya tara za su yi SU, don kada a mayar da shi SUSUSU. Kuma shi ke nan an shawo kan ’YAN MATAN JAbA DA SAMARIN KUSU, wadanda suka hada da: KWAMANDAN KALALLAME HAURO; TURMIN DAKAN HAURO ko bakin haure, wadanda suka jefa jama’a cikin haure-haure da hauragiya a kasar Haurobiya, wato MAIBURODI,wanda ya yi BIDIRI! BIREdE! BIREDI! da matsabban al’umma, a tsawon shekarun da ya tsuwurwurta MOTSIN MUTSUTTSUKE MATSABAI.
Kai a halin yanzu ma dimbin al’umma na kokawa kan yadda damin kudin da Gwamnatin Baban-burin-huriyya ke antayo wa mutane ta cikin kurtun halo alalo, ’yan damfarar damun fura na karbar abin hasafi kafin su karbo wa mutum kasonsa. Lallai wannan makaranta tana ankarar da hukuma kan ta dauki mataki!
Lallai akwai bukatar kulla kakkafar alaka tsakanin masu saye da sayarwa da kamfanin cinikin KWAKIN TELA, ta yadda za a yi ciniki keke-da-keke a zahiri babu gilla. daukacin bukatu a miko su ZALLA ba tare da wata ILLA ba.
Sannan JINJIRIN JARIRIN JARIN da aka JINkA wa al’umma a kasuwanni shi ma akwai wadanda kan yi uwa da makrbiya wajen ci da gumin wasu. Domin bayan da Usainin-Babajon Haurobiyawa ya kaddamar da shirin tallafa wa kananan masu hada-hadar kasuwanci a garin tako-tako wato Haurubja bangaren Utako, nan ma akwai wadanda suka himmatu wajen ganin sun kawo wa shirin tarnaki.
Bisa la’akari da tarnakin zagon kasan da ake ta haifar wa tsare-tsaren gwamnati na warware wa al’umma sasarin talalar talauci, wajibi ne jami’an hukuma, musamman ma’aikatan Babban Asusun Haurobiya da na Ma’aikatar Matsabbai, tare da jami’an Gogarma sha gwagwarmaya da arangama da masu fashi da mukami ko da dabara, a karkashin jagorancin Iro Mugun Madambaci su kara kaimi wajen ganin ba a nunke mutane a baibai ba.
