Wani mutum mai suna Obinna ya rasu lokacin da yake barci, bayan da gobara ta tashi a gidansa da ke yankin Iyana-Ipaja a Jihar Legas.
Kakakin rundunar ’yan sandan jihar, SP Benjamin Hundeyin ne, ya tabbatar wa Kamfanin Dillancin Labaran Najeriya (NAN) faruwar lamarin a ranar Lahadi.
- Dalilin da ba a fara biyan masu hidimar ƙasa N77,000 ba — NYSC
- Ambaliya: Ƙungiyar matan ’yan sanda ta bai wa Maiduguri tallafin kayayyaki
Ya ce gobarar ta faru ne a ranar Asabar da misalin ƙarfe 7:30 na dare.
Hundeyin ya bayyana cewa ’yan sanda sun samu kiran gaggawa daga wani mutum game da gobarar.
“Babban jami’in ’yan sanda na yankin ya gaggauta zuwa wajen bayan samun kiran.
“Haka kuma, an sanar da hukumar kashe gobara game da lamarin. Amma, da aka kashe gobarar, an gano wani mutu ya mutu a sanadin gobarar,” in ji shi.
Ya ƙara da cewa an ɗauke gawar mamacin zuwa ɗakin ajiye gawa na asibitin Yaba, kafin sanin musababbin tashin gobarar.
Ya ce ’yan sanda na gudanar bincike kan lamarin.
