Jami’an Hukumar Yaki da yi wa Tattalin Arzikin Kasa Ta’annati (EFCC) sun kama wasu mutane 14 da ake zargi da sayen kuri’u a rumfunan zabe a kananan hukumomin Otueke da Adawari da ke Bayelsa da kuma rumfunan zabe daban-daban a Imo da Kogi.
Mai magana da yawun EFCC, Dele Oyewale ne ya bayyana hakan a wata sanarwa da ya fitar ranar Asabar a Abuja.
A cewarsa, an kama wadanda ake zargin ne a wannan Asabar din yayin wani samame da aka yi ta hanyar leken asiri da aka fara kwanaki kadan gabanin zaben gwamnoni da ake gudanarwa a jihohin uku.
“Jami’anmu sun kwato jimillar tsabar kudi har N11,040,000, wanda suka kunshi N9,310,00 da aka kama daga hannun wadanda ake zargi da saye da sayar da kuri’u a Bayelsa.
“Akwai kuma N1,730,000 da aka kama daga hannun wadanda ake zargi da magudin zabe a Jihar Imo.
“Haka kuma an kama motoci biyu daga hannun wadanda ake zargin. Za a gurfanar da su gaban kotu da zarar an kammala bincike,” inji shi.
