Tsohon Gwamnan Jihar Kano, Malam Ibrahim Shekarau, ya ce dole ne a dawo daga rakiyar siyasar ubangida domin zaɓen shugabanni nagari.
Sanata Shekarau ya kuma yi Allah wadai da yadda wasu ‘yan siyasa ke dakile kwararar romon dimokuradiyya ga ayyukan gwamnati a Nijeriya ta hanyar yin watsi da ƙa’idojin gudanar da ayyukan da suka rataya a wuyansu.
Shekarau ya bayyana haka ne a lokacin da yake gabatar da ƙasida mai taken, ƙalubalen gudanar da harkokin siyasa daga jami’an gwamnati’ a wani taro na kwanaki 4 da aka shirya wa mambobin hukumar yi wa ma’aikata hidima ta ƙasa (NASC) da manyan jami’an gudanarwa na majalisar tarayya da aka fara a Abuja ranar Juma’a.
Shekarau ya ce maganganun da shugabannin siyasa ke yi a bainar jama’a don burge magoya bayansu ya saɓa wa ƙa’idojin aikin gwamnati.
Ya ƙara da cewa, naɗe-naɗen siyasa da ba su da muhimmanci kuma waɗanda ba su zama dole ba, na ƙara yawan kashe kuɗaɗe da hakan yana haifar da ruɗani a ayyukan jama’a.
A cewarsa, batun shugabanci shi ne babban jigon nasara na kowace ƙungiya ko al’umma.
