Fitaccen lauya kuma mai fafutukar kare hakkin bil Adama, Bulama Bukarti, ya dora alhakin kisan Sheikh Goni Aisami kan Rundunar Sojojin Najeriya.
Lauyan ya bayyana hakan ne cikin wani sako da ya wallafa a shafinsa na Facebook, inda yake bayyana alhininsa kan kisan shehin malamin da aka yi a ranar Juma’ar da ta gabata.
- Baraka ta janyo dakatar da daukar sabbin ’yan sanda
- Har yanzu a gidan haya nake zama a Abuja —Shekarau
Bukarti ya dora alhakkin kisan Sheikh Goni Aisami kacokam a kan Rundunar Sojin Najeriya, yana mai kafa hujja da cewa wanda ya aikata kisan, John Gabriel, soja ne, kuma da bindigarsa ta aiki ya yi hakan.
Bulama ya ce, “Akwai sakacin Rundunar Sojin Najeriya dangane da aikata laifin kisan.
“Dole rundunar sojin ta biya diyya ga iyalan mamacin domin da rigarsu da makaminsu wannan dan fashi ya yi amfani kuma sakacinsu ne,” in ji Bulama Bukarti.
Bulama ya yi kira da a gaggauta hukunta wanda ya aikata kisan, wato John Gabriel, tare da wanda ya taimaka masa.
