Alkaluman Hukumar Dakile Cututtuka Masu Yaduwa a Najeriya NCDC a ranar Talata sun nuna cewa an samu karin mutum 1,303 sabbin kamuwa da cutar Coronavirus a fadin Najeriya.
Sanarwar da NCDC ta fitar a shafinta na yanar gizo ta nuna cewa cikin sa’a 24 da gabata, an samu mutum 15 da cutar ta yi ajalinsu.
- Abin da ’yan Najeriya ke bukatar daga Sabbin Hafsohin Tsaro
- Na yi wa mata 50 fyade da fashi a gidaje 100
- Hatsarin mota ya yi ajalin mutum 4 tare da raunata wasu
An samu sabbin kamuwar ne daga wasu jihohi 26 na Najeriya ciki har da babban birnin kasar da suka hadar da; Legas (478), Abuja (211), Nasarawa (83), Ribas (72), Kwara (42), Edo (36), Ondo (34), da Binuwai (32).
Sauran su ne: Kaduna (32), Katsina (26), Filato (26), Kano (25), Taraba (25), Osun (22), Delta (21), Oyo (21), Neja (19), Sakkwato (18), Ebonyi (17), Ekiti (14), Gombe (13), Ogun (12), Bauchi (11), Zamfara (8), Borno (4) da Jigawa (1).
Da wannan sabbin bayanai da Hukumar ta fitar, a halin yanzu cutar Coronavirus ta harbi mutum 124,299 a fadin kasar yayin da kuma jimillar mutane 1,522 suka riga mu gidan gaskiya tun bayan bullar cutar karon farko a wata Fabrairu.
Taskar bayanai ta Hukumar NCDC ta nuna cewa an sallami 99,276 bayan sun warke, inda a halin yanzu mutum 23,501 kacal suka rage masu dauke da kwayoyin cutar a fadin kasar.
