Shugaban Kasa Muhammadu Buhari ya sake nada shugaban Hukumar Zabe ta Kasa Mai Zaman Kanta (INEC), Farfesa Mahmud Yakubu a matsayin shugaban hukumar a karo na biyu.
Kakakin shugaban kasar, Femi Adesina wanda ya tabbatar da hakan da yammacin ranar Talata ya ce Buhari ya sanar da sake nadin ne a wata wasika da ya aikewa da shugaban Majalisar Dattawa, Sanata Ahmad Lawan.
Buhari ya ce nadin ya dace da tanade-ranaden sashe na 154 (1) na kundin tsarin mulkin Najeriya na 1999 da aka yi wa gyaran fuska.
“Ina farin cikin gabatar da sunan Farfesa Mahmud Yakubu a matsayin shugaban INEC a karo na biyu domin neman amincewarku,” inji shugaban a cikin sanarwar da kakakin nasa ya wallafa.
Farfesa Mahmud dai ya dare shugabancin hukumar ne a 2015 kuma zai shafe karin wa’adin wasu shekaru biyar nan gaba matukar Majalisar ta amince da bukatar shugaban ta sake nada shi.
