✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Bakin haure 50,000 sun mutu a hanyar neman ingantacciyar rayuwa —IOM

Hukumar ta ce babu wani kokarin kirki da kasashe ke yi don shawo kan matsalar bakin haure balle hana aukuwar hakan.

Hukumar Kula da Masu Hijira ta Duniya (IOM) ta ce akalla bakin haure 50,000 ne suka mutu a fadin duniya.

Hukumar ta ce bakin hauren sun mutu ne bayan jefa rayuwarsu cikin hadarin yin kaura zuwa kasashen waje don samun ingantacciyar rayuwa.

“Yayin da akan samu dubban bakin hauren da ke mutuwa a hanya duk shekara, babu wani kokarin kirki da aka yi don shawo kan matsalar balle hana aukuwarta,”inji hukumar.

IOM ta bayyana a cikin wani sabon rahotonta da ta fitar ranar Laraba, cewa wannan adadi na wadanda suka mutu ne tun daga 2014.

Rahoton hukumar ya nuna babu wani kokarin a-zo-a-gani da kasashe ke yi don kula da lamarin bakin haure a yankunansu.