✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Babu Messi a jerin ’yan wasa 30 masu takarar lashe kyautar Balon d’Or ta bana

Wannan shi ne karon farko da aka fitar da sunayen masu takarar babu Messi tun daga 2006.

Babu sunan Lionel Messi a cikin jerin zaratan ’yan wasan kwallon kafa da ke takarar lashe kyautar Balon d’Or ta bana.

Messi wanda ya lashe kyautar har sau bakwai ya gamu da koma-baya sakamakon rashin sanya sunansa a cikin jerin zaratan ‘yan wasa 30 da ke takarar lashe kyautar da ake bai wa dan wasa mafi nuna hazaka a shekara.

Messi da ya sauya sheka daga Barcelona zuwa PSG da taka leda, tun shekara ta 2006 yake shiga cikin jerin ‘yan wasan da ke takarar lashe kyautar, yayin da a bara aka ayyana shi a matsayin wanda ya lashe kyautar.

Kazalika tun shekara ta 2007, yake shiga cikin jerin ‘yan ukun farko da ke takarar lashe kyautar, in ban da shekara ta 2018.

Sai dai a bana, Messi mai shekaru 35, bai samu shiga cikin ‘yan takarar ba, la’akari da rashin katabus da ya yi a duniyar kwallon kafa.

Lionel Messi a lokacin da ya lashe kyautar Ballon d’Or karo na bakwai.

Kazalika, sauyin da aka kawo wajen zakulo zaratan ‘yan wasan, shi ma ya kawo cikas ga Messi din, inda a yanzu aka daina la’akari da rawar da dan wasa ya taka a tsawon shekara guda, a maimakon haka, yanzu ana duba bajintar dan wasa ne a cikin kaka guda.

Tun dai da ya koma PSG daga Barcelona, dan wasan ya gaza nuna wata bajintar a-zo-agani a kungiyar ta Faransa wadda ke kishirwar lashe kofin gasar zakarun Turai. Hasali ma kwallaye 11 ya iya zurawa a raga a PSG din.

A ranar 17 ga wannan wata na Agusta ne za a gudanar da bikin karrama gwarzon dan wasan na bana a birnin Paris na Faransa.

Karim Benzema dai, shi ne kan gaba a jerin ‘yan wasan da hasashe ke nuna cewa, za su iya lashe kyautar ta Balon d’Or a bana, ganin yadda ya taimaka wa Real Madrid wajen lashe gasar Zakarun Turai da ta gabata.

Kazalika, akwai Cristiano Ronaldo na Manchester United da shi ma ke cikin masu takarar a bana, wanda jaridar L’Equipe ta tabbatar da cancantar shigarsa karo na 18 ke nan a jere babu fashi.

Jaridar ta ce Ronaldon ya taka rawar gani a United, wanda kwallaye 6 da ya ci ya kai kungiyar zagayen ’yan 16 a gasar Zakarun Turai. Haka kuma dan wasan ya ci kwallaye 32 cikin wasanni 49 da ya buga a kakar da ta gabata.

Ga dai jerin ’yan wasa 30 masu takarar lashe kyautar Balon d’Or ta bana:

  1. Karim Benzema, (Real Madrid)
  2. Thibaut Courtois, (Real Madrid)
  3. Vinicius Junior, (Real Madrid)
  4. Casemiro, (Real Madrid)
  5. Luca Modric, (Real Madrid)
  6. Antonio Rüdiger, (Real Madrid)
  7. Mohammed Salah, (Liverpool)
  8. Trent Alexander-Arnold, (Liverpool)
  9. Luis Díaz, (Liverpool)
  10. Fabinho, (Liverpool)
  11. Darwin Núñez, (Liverpool)
  12. Vigil Van Dijk, (Liverpool)
  13. Riyad Mahrez, (Manchester City)
  14. Bernardo Silva, (Manchester City)
  15. Phil Foden, (Manchester City)
  16. Kevin De Bruyne, (Manchester City)
  17. Joao Cancelo, (Manchester City)
  18. Erling Haaland, (Manchester City)
  19. Robert Lewandowski, (Barcelona)
  20. Heung-Min Son, (Tottenham)
  21. Karry Kane, (Tottenham)
  22. Joshua Kimmich, (Bayern Munich)
  23. Sadio Mané, (Bayern Munich)
  24. Leao, (AC Milan)
  25. Mike Maignan, (AC Milan)
  26. Nkunku, (Leipzig)
  27. Cristiano Ronaldo, (Manchester United)
  28. Kylian Mbappe, (PSG)
  29. Haller, (Borussia Dortmund)
  30. Dusan Vlahovic, (Juventus)