A yau Asabar Shugaban Kasa Muhammadu Buhari ya karbi zagaye na biyu na allurar rigakafin cutar Coronavirus.
An yi wa shugaban allurar rigakafin ta kamfanin AstraZeneca a Fadar Gwamnatin Najeriya da ke Abuja kamar yadda hadiminsa na kafafen sadarwa, Bashir Ahmad ya wallafa a shafinsa na Twitter.
Kazalika, Fadar Gwamnatin Najeriya ta wallafa wasu hotunan Shugaban yayin da yake karbar rigakafin, inda ya nuna shaidarsa domin sauran al’ummar kasar su yi koyi da hakan.
Shaidar da Shugaban ya haska na dauke da sakon tabbatar da inganci da kuma aminci a kan allurar rigakafin.
Ana iya tuna cewa, a farkon watan Maris ne Shugaba Buhari ya karbi zagayen farko na allurar, inda a yanzu ya kammala karbar rigakafin cutar kamar yadda mahukuntan lafiya suka shar’anta.
