A ƙoƙarinta na daƙile cin zarafin mata da yara, Ma’aikatar Harkokin Mata ta Jihar Gombe, ƙarƙashin jagorancin Kwamishina Asma’u Mohammed Iganus, ta gabatar da kundin dokar hana cin zarafi mata (GBV) ga Mai Martaba Sarkin Gombe, Alhaji Dokta Abubakar Shehu Abubakar III, domin samun goyon bayan sarakunan gargajiya wajen aiwatar da dokar a matakin ƙasa.
Taron da aka gudanar a zauren Ƙaramar Hukumar Gombe ya samu halartar manyan jami’ai, sarakunan gargajiya da shugabannin al’umma.
- LP za ta ceto Nijeriya daga halin da APC ta jefa ta — Nenadi Usman
- Rashin abinci mai gina jiki ya kashe yara 650 a Katsina — MSF
A wajen taron, Kwamishinar ta jaddada cewa dokar na buƙatar goyon bayan al’umma gaba ɗaya, musamman sarakunan gargajiya, waɗanda ke da tasiri wajen sauya tunanin jama’a da inganta tarbiyya.
Da yake karɓar daftarin dokar a madadin Sarkin Gombe, Ɗan Lawan Gombe, Dokta Sani Adamu Jauro, ya bayyana cikakken goyon bayan Masarautar Gombe kan wannan dokar.
Ya ce, “Mai Martaba na tare da wannan yunƙuri, kuma masarauta za ta haɗa kai da gwamnati da ƙungiyoyi wajen kare haƙƙin mata da yara.”
A nata jawabin, Kwamishina Asma’u Mohammed Iganus ta bayyana cewa, “Sarakunan gargajiya suna da matuƙar muhimmanci a wannan yaƙi, domin suna da ikon canza dabi’u da kuma tabbatar da bin doka a cikin al’umma.”
Shugaban Kwamitin Majalisar Dokokin Gombe kan Harkokin Mata, Mista Gabriel Galadima, ya tabbatar da cewa an fara aiwatar da dokar bayan Gwamna Muhammadu Inuwa Yahaya ya rattaba hannu a kanta.
Ya ce, “Wannan doka ta shafi kowa da kowa wadda ba sani ba sabo ce kuma babu wanda zai tsallaka ta.”
Shi ma, Shugaban Karamar Hukumar Gombe, Barrista Sani Ahmad Haruna, ya nuna goyon bayansa kan dokar tare da alƙawarin wayar da kai, tallafa wa waɗanda abin ya shafa, da kuma inganta sauyin dabi’u a cikin al’umma.
