Gwamnatin Jihar Kaduna ta sanar da sassauta dokar hana fita gaba ɗaya da ta sanya a garuruwan Kaduna da Zariya.
Daga yanzu dokar hana zirga-zirgar za ta fara aiki ne ƙarfe 6 na yamma zuwa 8 na safe.
Sanarwar da Kwamishinan Tsaron Jihar Kaduna, Samuel Aruwan, ya fitar a daren Laraba ta ce sassaucin zai fara aiki ne a safiyar Alhamis.
Aruwan ya bayyana cewa sassaucin na nufin, jama’a na da damar gudanar da harkokinsu na yau da kullum tun daga ƙarfe 8 na safe har zuwa 6 na yamma.
- Cafke sojan da ya harbe matashi a Zariya abun a yaba ne — Atiku
- Dan sanda ya kashe amarya a zanga-zanga a Kano
Amma an haramta zirga-zirga daga ƙarfe 6 na yamma zuwa 8 na safe, kuma an umarci jami’an tsaro da su tabbatar da ganin cewa jama’a sun bi sabuwar dokar.
Ya ce an amince a sassauta dokar hana fitar ce a yayin zaman Majalisar Tsaron jihar, bayan ta tattauna kan yanayin da al’amura suke gudana a manyan garuruwan da aka sa dokar.
Jami’an tsaro, a cewarsa ba za su sassauta ba, wajen ɗaukar ƙwaƙƙwaran mataki kan duk wani al’amari da ke iya kawo tangarɗa a bangaren tsaron jihar.
Kwamishinan ya ce majalisar ta lura cewa al’amura sun daidaita daidai gwargwado, don haka ta cimma wannan matsaya.
A ranar Litinin 4 ga watan na na Agusta ne Gwamnatin Kaduna ta sanya dokar hana fita a garuruwan biyu bayan tarzomar da ta biyo bayan zanga-zangar yunwa da tsadar rayuwa da aka gudanar a faɗin Najeriya.
