Rundunar ‘Yan Sandan Najeriya ta ce ‘Yan daba da suka karbe zanga-zangar #EndSARS sun kashe jami’anta biyu tare da datse wa Sufeton Dan Sanda, Egu Omini, al’aura a Jihar Ebonyi.
Kwamishinan ‘Yan sanda jihar, Philip Maku, ya ce ‘yan daba da ya ke zargin ‘Yan Kungiyar awaren Biafra ta IPOB ne, sun sace bindigogin ‘yan sadan da suka kashe.
- Zauna gari banza sun kashe ‘yan sanda 2 a Ondo
- ’Yan bindiga sun kashe ‘yan sanda, sun sace matan aure
- #EndSARS: An kona ofisoshin ‘yan sanda 2 da na AIT a Edo
“An kashe mana ‘yan sanda biyu da suka hada da Sufeto Egu Omini da PC Akpu Paul.
“An kuma raunata mana ‘yan sanda 4: ASP Akili Benson, Sufeto Okewu Sunday, Sufeto Egun Omini da kuma PC Ali Samson a harin da suka kai”, kamar yadda ya sanar a ranar Alhamis.
Kwamishinan ya ce, a harin da ‘Yan dabar suka kai babban ofishin ‘Yan sanda na tsakiyar gari Inugi, ranar 26 ga wata Oktoba, 2020, sun kone ofishin da motar sintiri da kuma motocin da ke gudanar da bincike Kansu da kekuna da baburan masu laifi da sauran kayayyaki.
“Da farko sun yi harbe-harbe kafin su yi wa sufeto Egu Omini kisan gilla su datse masa mazakuta su sace masa bindiga kirar AK-47,” inji kwamishinan.
Aminiya ta ruwaito cewa ‘Yan sanda hudu da aka raunata suna samun sauki a asibiti.
