Wasu ’yan bindiga da suka sace shugaban kwamitin yakin neman zaben jam’iyyar APC na karamar hukumar Ahoada ta Yamma a Jihar Ribas, Chisom Lennard, sun harbe shi har lahira.
’Yan bindigar da suka sace Lennard sun dira ne a rumfar zaben Ibagwa 2, da ke karamar hukumar sanye da kayan ’yan sanda ana tsaka da zaben gwamna da majalisar jiha.
- Dan shekara 35 ya kayar da Shugaban Majalisar Dokokin Yobe
- Jami’an tsaro sun datse hanyar zuwa Hedikwatar INEC a Kano
Kakakin jam’iyyar a jihar Darlington Nwauju ya tabbatar da faruwar lamarin, inda ya ce Chisom ya yi yunkurin hana ’yan bindigar sace kayayyakin zabe ne, daga nan ne kuma suka dauke shi suka tafi da shi.
“Ba wanda ya san inda suka kai shi, sai jiya da yamma ne aka tsinci gawarsa”, in ji shi.
An dai tsinto gawar tasa ce kwance cikin jini, da ramukan harbin bindiga a kan hanyar Ibueahi-Ubeta da ke karamar hukumar ta Ahoada.
