Rundunar Sojojin haɗin gwiwa ta birged na 1 na dakarun Operation Fansan Yamma, a Arewa maso Yamma sun kashe wani ƙasurgumin ɗan bindiga Alhaji Ma’oli a Jihar Zamfara.
An kashe Alhaji Ma’oli ne tare da wasu da ake zargin ‘yan tada ƙayar baya ne a ranar Alhamis.
- Turmutsutsun abinci: Najeriya na fuskantar annobar yunwa – LP
- An yanke wa direba hukuncin kisa kan kashe mutum 35 a China
Kakakin jami’an tsaron haɗin gwiwar, Laftanar Kanar Abubakar Abdullahi ya ce samamen da ya yi sanadin mutuwar Alhaji Ma’oli da na wasu ya faru ne a ƙauyen Mai Sheka da ke kusa da garin Kunchin Kalgo “wanda ɗaya ne daga cikin al’ummar yankin da ake ƙuntata wa kuma suke shan wahala daga Ma’oli”.
“Ma’oli ya yi suna a kullum ta hanyar ƙaƙaba wa mazauna unguwannin harajin da ba bisa ƙa’ida ba ga Unguwan Rogo, Mai Sheka, Magazawa, da sauran yankunan da ke kewaye da Bilbis a ƙaramar hukumar Tsafe ta Jihar Zamfara,” in ji Abdullahi a wata sanarwa a ranar Juma’a.
A cewarsa, mutuwar Ma’ oli ta “samar da kwanciyar hankali da farin ciki ga mazauna yankin Bilbis”.
Ya ce, wannan farmakin ya biyo bayan rahoton sirri da aka samu game da ayyukan ‘yan tada ƙayar bayan a kan babura da ke aiki a yankin Bilbis da ke gundumar Bilbis a Ƙaramar hukumar Tsafe a Jihar Zamfara.
