Angela Okorie, ’yar wasan da ta fara shirin fim a 2009, wacce kuma a baya ta kasance tauraruwar tallata sabulun Delta ta bayyana yadda ta gamu da abin da ake kira kauna a kasar Amurka.
’Yar wasan, wacce ya zuwa yanzu ta fito cikin fina-finai sama da 50, ta bayyana cewa babu shakka ta samu nasara a sana’arta, musamman kuma ta nuna yadda take da masoya a fadin duniya gaba daya.
Kamar yadda aka tambaye ta ko me za ta ce game da masoyanta da ta ce suna ko’ina a duniya, sai ta fara bayanin cewa:
“Zan iya tunawa, na gamu da abin da ake kira kauna ta hakika a birnin New York na Amurka, inda wata rana na je yin sayayya wani kanti; kawai sai ga wani kyakkyawan saurayi ya tunkare ni kai tsaye. Ya nuna mini matukar kauna, sannan ya ce ya yi matukar mamaki da ya hadu da ni ido-da-ido. Ni kuwa mamaki ya kama ni, inda na samu kwarin gwiwa na tambaye shi ko dalilin me ya sa ya fadi haka? Shi ne ya ce a duk cikin ’yan fim babu wacce yake kaunar ganin fuskarta sai ni. Ni kuwa na yi masa godiya, na ce ya ci gaba da kallon fina-finaina. Bai bar ni haka nan ba sai da ya nemi in rubuta masa sa hannuna. Ni kuwa na rubuta masa ba tare da bata lokaci ba.” Inji ’yar wasa Angela.
