Kungiyar Boko Haram ta yi ikirarin kakkabo jirgin yakin Rundunar Sojin Sama ta Najeriya da ake nema tun ranar Laraba.
Kungiyar ta fitar da wani bidiyo a yammacin ranar Juma’a wanda a ciki ta nuna wani mushen jirgin yaki mai dauke da tutar Najeriya da kuma lambar Rundunar da kuma gawar daya daga cikin matuka jirgin.
- Mutum 2,000 muka karbo daga ’yan bindiga ta hanyar sulhu —Matawalle
- ‘Ni na koya wa Ali Nuhu da Adam Zango rawa’
- Malaman Kano da Ganduje sun sa zare kan rigakafin COVID-19
Boko Haran ikirarin mayakanta ne suka baro jirgin, amma wasu kwararru na tantamar ko kungiyar na na karfin kakkabo jirgin yaki daga maboyarta.
A wata sanarwa da ya fitar ranar Juma’a, kakarin Rundunar, Edward Gabkwet, ya bayyana sunayen matuka jirgin amma bai yi karin bayani ba.
Kawo yanzu dai Rundunar ba ta ce uffan game da ikirarin kungiyar ba.
A cikin bidiyon an ga wasu mayaka a kan babura da motocin yaki suna tafiya a wari wuri da kura ta turnike.
Ya kuma nuna jirgin ya yi bindiga a sararin samaniya kafin ya fado, sannan daga karshe aka ga wani mayaki dauke da bindiga fuskarsa a kan mushen jirgin.
Mayakin ya ce, “An turo jirgin yaki na Rundunar Sojin Sama ta Najeriya mai lamba 475 zuwa Sambisa ya yaki Mujahidai.
“Ba mai iya yaki da Allah, ga kuma shaidar abin da Allah Ya yi. Ba yadda za ku yaki bayin Allah ba tare da irin wannan ya faru ba,” inji shi cikin harshen Turanci.
