Kotun Musulunci a Jihar Kano ta tsare fitaccen mawakin Musulunci, Usman Mai Dubun Isa a gidan yari, bisa zargin cin mutuncin daya daga cikin jagororin darikar Tijjaniyya a jihar, Sheikh Tijjani Usman Zangon Bare-bari.
An gurfanar da Mai Dubun Isa ne bisa zargin furta kalaman cin mutunci ga Sheikh Usman Zangon Bare-Bari, ta shafinsa na TikTok, wanda hakan ya sa malamin daukar matakin shari’a.
- Mai koyon kitso ta sace jaririn uwar gidanta a Neja
- Tuna Baya: Tarihin shugaban ƙasar Najeriya: Janar Olusegun Obasanjo
Sai dai a lokacin da aka gurfanar da Mai Dubun Isa a gaban kotun Musulunci da ke zamanta a PRP Gama a ranar Litinin, ya musanta zargin da ake masa.
Lauyan mawakin, A. J. Usman, ya bukaci a ba da belinsa, amma lauyan mai kara ya bayyana cewa yin hakan na iya zama hadari ga rayuwarsa, domin mabiyan malamin na iya far masa.
A kan haka ne alkalin kotun, Malam Nura Yusuf Ahmad, ya ba da umarnin a tsare Mai Dubun Isa a gidan yari, ya kuma dage sauraron shari’ar zuwa ranar 17 ga watan Agusta mai kamawa.
