An sallami ragowar mutum biyar da suka rage masu cutar coronavirus a jihar Sokoto.
Warkewar mutanen biyar ya kara yawan wadanda suka warke daga cutar a jihar zuwa 102.
Mutum 116 ne suka harbu da annobar coronavirus a jihar, amma 14 daga cikinsu sun rasu.
A ranar Alhamis ne Kwamishinan Lafiya na Jihar Sokoto Dokta Ali Inname ya ce yanzu babu sauran mai cutar a jihar.
- An girke jiragen da za su yaki ’yan bindiga a Sokoto
- Har yanzu babu coronavirus a Kogi – Yahaya Bello
Sai dai Dokta Inname ya ce, “hakan ba ya kore yiwuwar sake bullar cutar ta COVID-19 a jihar.
“Za mu ci gaba da gwajinta, idan aka samu mai ita za mu killace shi a kula da lafiyarsa.”
Ya kuma jaddada kira ga jama’a da su daina kyamar wadanda suka warke daga annobar.
Ya ce kamuwa da cutar ba mutuwa ba ce kuma mutum na iya harbuwa da ita, ya warke bai ma sani ba.
