✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Hushpuppi: Kotu ta dage yanke hukunci da wata 5

An dage yanke hukunci da wata biyar zuwa 11 ga watan Yuli, 2022

Kotu ta dage ranar yanke hukunci kan kasurgumin dan damfarar nan dan Najeriya mai tashe a kafafen sada zumunta, Ramon Abbass wanda aka fi sani da Hushpuppi kan damfarar mutane miliyoyin daloli a kasashe daban-daban.

Kotun da ke zamanta a yankin California na kasar Amurka ta dage zaman yanke hukuncin ne zuwa 11 ga watan Yuli, 2022, sabanin ranar ranar Juma’a 14 watan Fabarirun da aka sanya da farko.

Sanarwar da kotun ta fitar ranar 2 ga Fabrairu, 2022, ta ce, “Bisa bukatar lauyoyi, an dage ranar yanke hukuncin zuwa ranar 11 ga watan Yuli, 2022, da misalin karfe 11:00 na safe.”

Tun da farko kotun ta sanya ranar yanke hukunci ne bayan wanda ake zargin ya amsa a gabanta cewa ya damfari mutane na miliyoyin daloli a kasashe daban-daban na tsawon shekaru.

Alkalin kotun, Mai Shari’a Otis D. Wright, ya kuma ba da umarnin a ci gaba da tsare Hushpuppi wanda ke fuskantar zargin damfarar mutane miliyoyin daloli a sassan duniya.

Sanarwar kotun ta bayyana cewa alkalin ya dage zaman ne bisa bukatar lauyoyin da ke kare Hushpuppi karkashin jagorancin Louis Shapiro.