Hukumar Hasashen Yanayi ta Najeriya (NiMet), ta yi gargaɗin cewa za a fuskanci zafin rana mai tsanani a kwanaki masu zuwa, a wasu yankuna na Najeriya.
A cewar NiMet, jihohin da za su fi fuskantar wannan yanayi sun haɗa da Kebbi, Neja, Kwara, Oyo, Kogi, Nasarawa, Benuwai, Enugu, Anambra, Abiya, Ebonyi, Kuros Riba da Babban Birnin Tarayya.
- ’Yan sanda sun ceto mutum 30 daga hannun ’yan bindiga a Katsina
- Dan ta’adda zai biya tarar miliyoyi bayan shan dukan kawo wuka a Katsina
Sauran yankunan da ake tsammanin za su fuskanci zafi mai tsanani sun haɗa da Kudu Maso Yamma, Taraba, Adamawa, Filato, Kaduna, Zamfara, da Sakkwato.
Zafi mai tsanani na iya zama hatsari ga lafiyar jikin mutum, yana iya haifar da matsaloli kamar bugun zuciya da zafin jiki mai yawa.
Hukumar Lafiya ta Duniya (WHO), ta yi gargaɗin cewa bugun zuciya na faruwa ne a lokacin da jikin mutum ba zai iya daidaita zafin jikinsa ba, wanda ka iya haifar da lalacewar gaɓoɓin jiki ko ma rasa rai baki ɗaya.
Ga hanyoyi guda shida da mutum zai bi don kare kansa daga zafi mai tsanani:
1. Tufafi Marasa Nauyi
Zaɓar tufafin da ba su da nauyi kuma masu launin haske, waɗanda aka yi da auduga su ne suka fi dacewa da wannan yanayi. Tufafin da ba su matse jiki ba suna bai wa iska damar shiga ko ina, hakan yana taimakawa wajen rage zafi.
2. Kula da Ƙiba
Mutanen da suke da ƙiba suna da hatsarin kamuwa da cututtukan da suka shafi zafi saboda kitsen jikinsu yana hana zafi fita cikin sauƙi. Kula da nauyin jiki zai taimaka wajen daidaita zafin jiki.
3. Cin Abinci Mara Nauyi
Zaɓar abinci masu ɗauke da ruwa kamar kayan lambu da ‘ya’yan itatuwa na da matuƙar amfani a wannan yanayi. Cin abinci mai nauyi yana ƙara zafin jiki saboda yana buƙatar kuzari mai yawa wajen narkewa.
4. Gujewa Aiki A Cikin Rana
Yana da kyau ake zama a gida idan ana rana mai zafi sosai. Idan dole sai mutum ya fita, to yana da kyau ya fita da safe ko bayan faɗuwar rana. Sannan yana da kyau mutum ya huta idan jikinsa ya fara nuna gajiya.
5. Shan Ruwa da Yawa
Mutum ya tabbata yana shan ruwa sosai da rana, sannan ya ci abinci masu ruwa kamar kankana, gurji, da lemu. Yin wanka da ruwan sanyi ko saka rigar da aka jiƙa da ruwa na taimakawa wajen rage zafi.
6. Rage Shan Barasa
Shan barasa yana sa jiki ya rasa ruwa, wanda zai iya ƙara hatsarin kamuwa da matsalolin da suka shafi zafi. WHO ta bayar da shawarar a rage shan giya ko barasa a lokacin zafi mai tsanani.
Idan aka bi waɗannan shawarwari, za a iya rage hatsarin da zafi mai tsanani ke haifarwa, tare da kare lafiya.
