COVID-19 ta kashe mutum 17 a Legas

Mutum 17 ne suka mutu sakamakon cutar coronavirus a kasa da awa 48 a jihar Legas.

Kwamishinan Lafiya na jihar Legas Farfesa Akin Abayomi ne ya sanar da haka ta kafar Twitter.

Ya ce a ranar Talata, 2 ga watan Yuli an samu mutum 9 da suka mutu, lamarin da ya sanya yawan wadanda suka rasu a jihar Legas suka kai mutum 59.

• Ba yanzu za mu janye dokar hana fita ba – Badaru
• Zulum ya dakatar da ma’aikatan asibitin Ngala

Bayan sa’a 24 kuma ya sake sanarwa cewa an sami karuwar mutum takwas da suka mutu, lamarin da ya sa adadin wadanda aka rasa a sakamakon cutar a Legas ya kai mutum 67.

Zuwa yanzu mutum 5,277 ne aka tabbatar sun kamu da cutar a Legas, yayin da aka sallami mutum 858 bayan sun warke, sai  kuma mutum 4,352 da ke ci gaba da jinyar cutar a jihar.